شہید ڈاکٹر محمد مرسیؒ

میں انقلابی طریق بھی تھا

جماعتوں کا صدیق بھی تھا

امورِ حق میں لئیق بھی تھا

جواں دلوں کا رفیق بھی تھا

میں ولولوں میں غریق بھی تھا

معاشرت میں خلیق بھی تھا

یہی تھا میرا قصور کہ میں

اصولِ حق میں عمیق بھی تھا

رہِ خدا میں اسیر ہو کر

صعوبتیں بھی اٹھا چکا ہوں

میں اپنی منزل کو پا چکا ہوں

وفا ہے کیا یہ بتا چکا ہوں

میں ظلمتوں میں منیر بھی تھا

عزیمتوں کا اثیر بھی تھا

حکومتوں کو نذیر بھی تھا

میں راہِ حق کا اسیر بھی تھا

حقیر بھی تھا ، فقیر بھی تھا

میں خود ہی اپنا ضمیر بھی تھا

یہی تھا میرا قصور کہ میں

فراعنہ پر نکیر بھی تھا

نظامِ حق کی طلب میں یارو

یہ جان اپنی گنوا چکا ہوں

میں اپنی منزل کو پا چکا ہوں

وفا ہے کیا یہ بتا چکا ہوں

میں دینِ حق کا وزیر بھی تھا

مشیر بھی تھا، سفیر بھی تھا

جو دشمنوں پر نکیر بھی تھا

تو مومنوں پر حریر بھی تھا

جہانِ مسلم کا پیر بھی تھا

امورِ حق میں بصیر بھی تھا

یہی تھا میرا قصور کہ میں

مجاہدوں کا امیر بھی تھا

میں دینِ احمد کی سر بلندی

پہ اپنا سب کچھ لٹا چکا ہوں

میں اپنی منزل کو پا چکا ہوں

وفا ہے کیا یہ بتا چکا ہوں

میں اپنی منزل کو پا چکا ہوں

خدا کے ملنے کو آ چکا ہوں

اے میری تحریک کے جوانو

وفا ہے کیا یہ بتا چکا ہوں