خود ساختہ علّامہ

لہُو کانوں سے بہتا ہے کہاں تک زخم دیں خود کو

یہاں کچھ لوگ ایسے ہیں جو علّامہ کہیں خود کو

جو علّامہ کا پرچم خود اٹھائے با رہا نکلے

کسوٹی پر انھیں پرکھا تو پورے بے حیا نکلے

مجھے امید تھی جس کی تو مطلعے میں وہی دیکھا

کہیں ایطا جلی دیکھا کہیں ایطا خفی دیکھا

جو خود اپنی ہی نظروں میں ادب کے اک دلارے ہیں

مگر اشعار تو ان کے شتر گربہ کے مارے ہیں

انھیں غالب سے کم لگتی نہیں اپنی سبھی غزلیں

شکست ناروا کے غم میں ڈوبی ہیں کئی غزلیں

سمجھنا ان کا ہے ایسا کہ وہ اپنی حدوں میں ہیں

کئی ارکان ہیں ایسے تنافر کی زدوں میں ہیں

وہ فن کے خوب ماہر ہیں زمانے کو جتاتے ہیں

مگر اشعار تو تعقید کے آنسو بہاتے ہیں

وہ بھر کر شہد لائے ہیں یقیں مانو کریلے میں

سکوت معنوی در آیا ہے غزلوں کے میلے میں

سُخن کی محفلوں میں جب ادب کا جام بھرتے ہیں

تلفّظ کا قسم سے خوب قتل عام کرتے ہیں

انھیں لگتا ہے ان کی شاعری سے لوگ خائف ہیں

مگر افسوس ہے اشعار بھی ان کے تخالف ہیں

ہمیں وہ مان بیٹھے ہیں یقینًا اب حریفوں میں

تقابل جب سے دکھلایا انھیں ان کی ردیفوں میں

بڑی تذلیل کرتے ہیں یہ جملے خود نمائی کے

جو چاہیں ڈھونڈنا ملتے نہیں پہلو صفائی کے

عجب خود ساختہ استاد ہیں وہ ذات میں اپنی

نئے پیوند رکھتے ہیں ہمیشہ بات میں اپنی

جہاں چاہیں وہاں جاکر پڑھاتے ہیں نصاب اپنا

مگر بھولے سے بھی کرتے نہیں ہیں احتساب اپنا

اٹھائے پھر رہے ہیں آپ اپنے نام کا پرچم

یہ خوش فہمی کا عالم ہے عجب انسان ہیں مبہم

مجھے محفوظ رکھنا یا خدا ایسے ادیبوں سے

پناہیں مانگتا ہوں خود نمائی کی صلیبوں سے

زبیر ؔ اتنی دعا ہے یا خُدا تو آگہی دے دے

انھیں شاعر بنایا ہے تو فن شاعری دے دے